Hebbelikhede - Tapa blanda

Elke mens het 'n eie persoonlikheid en 'n spesifieke geaardheid. Dit is wat ons individue maak. 'n Mens se persoonlikheidstipe maak jou vatbaar vir sekere hebbelikhede. Volgens die verklarende handwoordeboek van die Afrikaanse taal is 'n hebbelikheid 'n "(hinderlike) gewoonte, aanwensel, neiging". Besonder individualistiese mense is dikwels interessante mense. Hulle hoekigheid en andersheid is kleurvol. Hulle woede of spoggery of skindery of opneukery of dwarsheid of ondersteboheid is die sout en peper van menslikheid. Hierdie titel gaan egter oor geaardhede wat vasval in sekere hebbelikhede dermate dat dit die persoonlikheid oorheers. Dit word dan iets wat ander mense kwaad maak of irriteer en dus 'n karaktertrek wat die grens van aanvaarbaarheid oorskry. Hoewel ander mense dit aanvanklik verduur of dit selfs interessant kan vind, word dit later vir hulle 'n ergernis. Dit gaan hier oor die "te" van 'n faset van mens se geaardheid. Te jaloers, nederig, aggressief, skynheilig of wat ook al. Gewoonlik het dit 'n vernietigende uitwerking op so 'n mens se verhoudings. Hierdie title is gebaseer op die kennis wat De Klerk van sy eie hebbelikhede opgedoen het, op 'n leeftyd se saamwees met ander mense, en op ervarings in die spreekkamer waar hy vir baie jare as sielkundige terapeut probeer help het met die identifikasie en tempering van hebbelikhede wat te erg geword het. Plek-plek word gevallestudies uit sy spreekkamer gebruik.